రాజస్థాన్లోని జోద్పూర్ నానోబాట్ స్టార్టప్ అంతర్జాతీయ విజయగాథ.
రాజస్థాన్లోని జోద్పూర్ కు చెందిన నానోబాట్ హౌస్వేర్ సొల్యూషన్స్ అనే స్టార్టప్ విజయగాథ దేశవ్యాప్తంగా ఆదర్శంగా నిలుస్తోంది. ఈ సంస్థ స్టెయిన్లెస్ స్టీల్ వాక్యూమ్ ఇన్సులేషన్ వాటర్ బాటిళ్ల తయారీలో నాణ్యతకు రాజీ పడకుండా, ప్రపంచ స్థాయి ప్రమాణాలను అందిస్తోంది. విదేశాల్లో కూడా వీటి కోసం డిమాండ్ ఉండటంతో, అంతర్జాతీయ బ్రాండ్లతో పోటీ పడుతోంది. ఈ విశేషాన్ని గుర్తించిన కేంద్ర మంత్రి పీయూష్ గోయల్, మేక్ ఇన్ ఇండియా స్ఫూర్తిదాయక ఉదాహరణగా ఎక్స్లో ప్రశంసించారు.
నానోబాట్ వ్యవస్థాపకుడు వికాస్ జైన్ 2016లో ఈ ప్రయాణాన్ని ఆరంభించారు. పర్యావరణహిత, అందుబాటు ధరలో ప్రపంచస్థాయి బాటిళ్లు తయారు చేయాలని సంకల్పించి, 2018లో కంపెనీని స్థాపించారు. స్థానిక యువతకు ఉపాధి కల్పించడం, భారతీయ సరఫరాదారులకు అండగా నిలవడం లక్ష్యంగా పెట్టుకున్నారు. ప్రారంభంలో 51 మంది సిబ్బందితో మొదలైన ఈ సంస్థ, ప్రస్తుతం 200 మందికి పైగా ఉద్యోగులను కలిగి ఉంది.
దేశీయ మార్కెట్లతో పాటు, విదేశాలకు కూడా తమ ఉత్పత్తులను ఎగుమతి చేస్తూ, సంస్థ మరింత విస్తరణ దిశగా అడుగులు వేస్తోంది. వికాస్ జైన్ యొక్క కృషి, దూరదృష్టి, మరియు నాణ్యత పట్ల నిబద్ధతకు కేంద్ర మంత్రి ప్రశంసలు కురిపించారు. భారతీయుల విజయ రహస్యం మంచి ఆలోచన, కష్టపడే మనస్తత్వమని గోయల్ పేర్కొన్నారు. మేక్ ఇన్ ఇండియా పథకంలో నానోబాట్ ఒక ప్రతిష్టాత్మక ఉదాహరణగా నిలిచింది.
