గోదావరి నీటి వివాదంపై నితిన్ గడ్కరీ కీలక వ్యాఖ్యలు

తెలుగు రాష్ట్రాల మధ్య గోదావరి నీటి వివాదం నడుస్తున్న వేళ, కేంద్ర మంత్రి నితిన్ గడ్కరీ కీలక వ్యాఖ్యలు చేశారు. గోదావరి నది నీరు ప్రతి ఏడాది 1400 టీఎంసీలు సముద్రంలోకి వృథాగా వెళ్తోందని, ఈ నీటిని సద్వినియోగం చేసుకోవాలని ఆయన అన్నారు. నీటి వివాదాలకు బదులు, పరివాహక రాష్ట్రాలు నీటిని ఒడిసి పట్టే ప్రయత్నాలు చేయాలని సూచించారు. గోదావరి నీటిని కృష్ణ, పెన్నార్, కావేరీ నదులకు మళ్లిస్తే తమిళనాడు వరకు నీరు అందుతుందని, దీనివల్ల నాలుగు దక్షిణ రాష్ట్రాల నీటి సమస్యలు తీరతాయని చెప్పారు.

దేశంలో నీటి కొరత కాదని, నీటి నిర్వహణలో లోపమే సమస్య అని గడ్కరీ స్పష్టం చేశారు. గోదావరి నీటిని సమర్థవంతంగా వినియోగించుకోవడం ద్వారా తెలంగాణ, ఆంధ్రప్రదేశ్, కర్ణాటక, తమిళనాడు మధ్య నీటి వివాదాలను పరిష్కరించవచ్చని ఆయన అభిప్రాయపడ్డారు. ఈ విషయంలో రాష్ట్ర ముఖ్యమంత్రులతో చర్చలు జరిపి, నీటి సంరక్షణకు చర్యలు తీసుకోవాలని సూచించారు. గడ్కరీ వ్యాఖ్యలు రాజకీయ, సామాజిక వర్గాల్లో చర్చనీయాంశంగా మారాయి.