బిఆర్ఎస్‌ లో అన్నా-చెల్లెలి విభేదాలు: రాజకీయ రగడ
బిఆర్ఎస్‌ లో జరుగుతున్న పరిణామాలు ఆసక్తికర చర్చలకు దారితీస్తున్నాయి. పార్టీ వర్కింగ్ ప్రెసిడెంట్ కేటీఆర్, తెలంగాణ జాగృతి అధ్యక్షురాలు కవిత మధ్య విభేదాలు రోజురోజుకూ తీవ్రమవుతున్నాయి. ఒకే పార్టీలో ఉంటూ, అధికార పార్టీతో పోరాడాల్సిన సమయంలో, అన్నా-చెల్లెలు ఒకరిపై ఒకరు తలపడుతుండటం పార్టీలో అయోమయాన్ని సృష్టిస్తోంది.
బిఆర్ఎస్‌ పార్టీ రజతోత్సవ సభ సందర్భంగా కవిత, కేసిఆర్‌కు రాసిన లేఖతో మొదలైన వివాదం ఇంకా చల్లారలేదు. ఈ విభేదాలు మరింత రగులుకున్నాయి. తాజాగా, తెలంగాణ బొగ్గుగని కార్మిక సంఘం (టీబీజీకేఎస్) అధ్యక్షునిగా మాజీ మంత్రి కొప్పుల ఈశ్వర్‌ను నియమించడం ఈ వివాదానికి మరో కొత్త మలుపు తీసుకొచ్చింది. కవిత గౌరవ అధ్యక్షురాలిగా ఉన్న ఈ సంఘంలో ఆమెను తొలగించకుండానే మరొకరికి బాధ్యతలు అప్పగించడం వివాదాస్పదమైంది.
అమెరికాలో ఉన్న కవిత, ఈ నిర్ణయంపై బహిరంగ లేఖ రూపంలో ఘాటుగా స్పందించారు. ఏ సంఘం నుంచి అయినా బాధ్యతలు తొలగించాలంటే జనరల్ బాడీ సమావేశం నిర్వహించి తీర్మానం చేయాలని, అలాంటి ప్రక్రియ లేకుండానే తనను తొలగించడం సరికాదని ఆమె ప్రశ్నించారు. తనపై కక్షపూరితంగా వ్యవహరిస్తున్నారని ఆరోపించారు. గతంలో ఎప్పుడూ ఇలాంటి వ్యాఖ్యలు చేయని కవిత, ఈసారి కేటీఆర్‌తో పాటు హరీష్ రావు, జగదీష్ రెడ్డిలను ఉద్దేశించి ఆరోపణలు చేశారు.
ఈ పరిణామాలు బిఆర్ఎస్‌లో తీవ్ర చర్చనీయాంశమయ్యాయి. కవిత ఆరోపణలను పార్టీ సీరియస్‌గా తీసుకుంది. ఆమె చేసిన తప్పుల వల్లే ఈ పరిస్థితి వచ్చిందని, కక్షగట్టారని ఆరోపించడం సమంజసం కాదని పార్టీ నేతలు అంటున్నారు. ఈ వివాదం పార్టీ ఐక్యతపై ప్రభావం చూపనుంది.
