కాళేశ్వరం విచారణ కమిషన్ ముందు హరీష్ రావు హాజరు
కాళేశ్వరం విచారణ కమిషన్ ముందు హరీష్ రావు హాజరు :
BRS నేత, మాజీ ఇరిగేషన్ మంత్రి హరీష్ రావు కాళేశ్వరం ప్రాజెక్ట్ విచారణ కోసం కమిషన్ ముందు హాజరయ్యారు. హరీష్ రావు తో పాటు కొందరు ఎమ్మెల్యేలు కూడా PCB గోస్ ఆఫీస్‌కు చేరుకున్నారు.
హరీష్ రావు మాట్లాడుతూ, కాంగ్రెస్ పార్టీ కాళేశ్వరం ప్రాజెక్ట్‌పై తప్పుడు ప్రచారం చేస్తోందని ఆరోపించారు. కమిషన్ అడిగిన అన్ని ప్రశ్నలకు వివరంగా సమాధానాలు ఇస్తానని, తమ వద్ద ఉన్న పూర్తి సమాచారాన్ని సమర్పిస్తామని, అంతేకాకుండా కొన్ని డాక్యుమెంట్లను కూడా అందజేస్తామని తెలిపారు. కొంతమంది వ్యక్తులు, కొన్ని పార్టీలు ఉద్దేశపూర్వకంగా కాళేశ్వరం ప్రాజెక్ట్‌పై బురదజల్లే ప్రయత్నం చేస్తున్నాయని ఆయన ఆరోపించారు. ప్రభుత్వం విద్వేషంతో కాకుండా వివేకంతో, విజ్ఞతతో ఆలోచించి నిర్ణయాలు తీసుకోవాలని సూచించారు. తమపై బురద జల్లే ప్రయత్నాలు చేస్తూ రైతులకు అన్యాయం చేస్తున్నారని, తమ పార్టీ దేవుడి మీద, రాజకీయ నీతిపై నమ్మకం ఉన్న పార్టీ అని, చివరికి న్యాయమే గెలుస్తుందని, ధర్మం నిలబడుతుందని హరీష్ రావు అన్నారు.
రెండు రోజుల క్రితం హరీష్ రావు ఏమన్నారు ?
రెండు రోజుల క్రితం కాళేశ్వరం గురించి మాట్లాడుతూ, ఈ ప్రాజెక్ట్ 3 బ్యారేజ్‌లు, 15 రిజర్వాయర్‌లు, 19 సబ్-స్టేషన్లు, 21 పంప్ హౌస్‌లు, 203 కిలోమీటర్ల సొరంగాలు, 1531 కిలోమీటర్ల గ్రావిటీ కెనాల్స్, 98 కిలోమీటర్ల ప్రెషర్ మెయిన్స్, 141 టీఎంసీల నీటి నిల్వ సామర్థ్యం, 530 మీటర్ల ఎత్తుకు లిఫ్ట్, 240 టీఎంసీల నీటి వినియోగంతో కూడినదని వివరించారు. ఈ మొత్తం నిర్మాణాల్లో మూడు బ్యారేజ్‌లలో ఒక బ్యారేజ్‌లో కేవలం రెండు స్తంభాలు మాత్రమే కుంగిపోయాయని, అయినప్పటికీ కాళేశ్వరం మొత్తం కూలిపోయిందని, దీనికి పనికిరాదని తప్పుడు ప్రచారం చేస్తున్నారని ఆయన ఆరోపించారు. కాళేశ్వరం లేకుండా పంటలు పండాయని ప్రభుత్వం చెప్పడం పచ్చి అబద్ధమని హరీష్ రావు అన్నారు.
విచారణలో హరీష్ రావు ప్రెస్ మీట్ :
90 నిమిషాల విచారణ అనంతరం బయటకు వచ్చిన హరీష్ రావు, కమిషన్ ముందు రాజకీయంగా మాట్లాడలేదని, కమిషన్‌కు ఇచ్చిన సమాచారాన్ని మీడియాకు కూడా వెల్లడిస్తున్నామని తెలిపారు. మేడిగడ్డ బ్యారేజ్ స్థానం ఎందుకు మార్చారనే అంశంపై ఎక్కువ సమయం చర్చ జరిగిందని, దానికి తాను పూర్తి వివరణ ఇచ్చానని చెప్పారు. కొత్తగా ఏర్పడిన తెలంగాణ ప్రభుత్వం మేడిగడ్డ బ్యారేజ్ కట్టడానికి నిర్ణయించిందని, అప్పటి కాంగ్రెస్ ప్రభుత్వం సరైన ప్రణాళిక లేకుండా పనులు ప్రారంభించిందని ఆరోపించారు. తాను ఇరిగేషన్ మంత్రిగా ఉన్నప్పుడు ఈ ప్రాజెక్ట్‌ను సమీక్షించి, దానికి గణనీయమైన ఖర్చు చేశామని, మహారాష్ట్ర ఇరిగేషన్ మంత్రితో కూడా చర్చలు జరిపినట్లు తెలిపారు. అయితే, మహారాష్ట్ర ప్రభుత్వం అనుమతి నిరాకరించిందని, అప్పటి మహారాష్ట్ర సీఎం కిరణ్‌కుమార్ రెడ్డికి లేఖ రాశామని, ఆ లేఖలో నిర్ణయాలు తీసుకుని పనులు చేస్తే ఎలాంటి అడ్డంకులు ఉండవని పేర్కొన్నట్లు చెప్పారు. ఆ లేఖను కూడా కమిషన్‌కు అందజేశామని తెలిపారు.
సెంట్రల్ వాటర్ కమిషన్, మేడిగడ్డ బ్యారేజ్ డిజైన్‌పై రెండు లేఖలు రాసిందని, రాప్కోస్ అనే కేంద్ర ప్రభుత్వ సంస్థ ఇచ్చిన సర్వే రిపోర్ట్ ఆధారంగా ప్రాజెక్ట్ డిజైన్‌ను మార్చామని, ఆ వివరాలను కూడా కమిషన్‌కు సమర్పించామని హరీష్ రావు తెలిపారు. కాళేశ్వరం కార్పొరేషన్‌కు కేబినెట్ అనుమతి ఉందా అని కమిషన్ అడిగిన ప్రశ్నకు, ఆ డాక్యుమెంట్‌ను కూడా అందజేశామని, బ్యారేజ్ స్థాన మార్పులు పూర్తిగా ఇంజనీర్ల సర్వే ఆధారంగా జరిగాయని వివరించారు.
కాళేశ్వరం పై ఆరోపణలపై హరీష్ రావు స్పందన :
కొందరు కాళేశ్వరం ప్రాజెక్ట్‌ను “కులేశ్వరం” అని పిలుస్తున్నారని, అయితే సీఎం రేవంత్ రెడ్డి గతంలో గంగమల్ల ప్రాజెక్ట్‌కు శంకుస్థాపన చేశారని, ఆ గంగమల్లకు నీరు మల్లన్నసాగర్ నుంచి వస్తుందని, అది కాళేశ్వరం ప్రాజెక్ట్‌లో భాగమేనని హరీష్ రావు ప్రశ్నించారు. అలాగే, హైదరాబాద్‌కు మూసీ సుందరీకరణ కోసం 30 టీఎంసీల నీటిని తీసుకొస్తామని చెబుతున్నారని, ఆ నీరు కూడా మల్లన్నసాగర్ నుంచే వస్తుందని, అది కాళేశ్వరం ప్రాజెక్ట్‌లో భాగమేనని ఆయన అన్నారు. కాళేశ్వరం ప్రాజెక్ట్‌పై ఆధారపడి ఇతర ప్రాజెక్టులకు టెండర్లు పిలుస్తూ, ఒకవైపు కాళేశ్వరం కూలిపోయిందని, కులేశ్వరం అని అనడం సమంజసం కాదని ఆయన ఆరోపించారు. కాళేశ్వరం తెలంగాణకు జీవనది అని, కమిషన్ ముందు అన్ని ఆధారాలను సమర్పించామని హరీష్ రావు స్పష్టం చేశారు.
