ఫైనల్ మ్యాచ్: బ్యాటింగ్, బౌలింగ్, ఫీల్డింగ్ – అన్నీ ఆధిపత్యం

టాస్ గెలిచి ముందు బ్యాటింగ్ ఎంచుకున్న భారత్, 50 ఓవర్లలో 7 వికెట్ల నష్టానికి 298 పరుగులు చేసింది. ఓపెనర్ షఫాలీ వర్మ 78 బంతుల్లో 87 పరుగులతో సఫారీ బౌలర్లను దడపెట్టింది – 7 ఫోర్లు, 2 సిక్సర్లతో మైదానం దద్దరిల్లింది. స్మృతి మంధాన (45)తో కలిసి మొదటి వికెట్‌కు 104 పరుగుల భాగస్వామ్యం నెరిపింది. మధ్యలో దీప్తి శర్మ 58 బంతుల్లోనే 58 పరుగులు జోడించి ఇన్నింగ్స్‌కు బలాన్ని ఇచ్చింది. చివరి ఓవర్లలో రీచా ఘోష (26 నాటౌట్) దూకుడుగా ఆడి స్కోరును గణనీయంగా పెంచింది.

299 పరుగుల లక్ష్యంతో ఛేదనకు దిగిన దక్షిణాఫ్రికా 45.3 ఓవర్లలో 246కే ఆలౌటైంది. కెప్టెన్ లారా వోల్వార్ట్ సెంచరీ (101) చేసినా, మిగతా బ్యాటర్లు తోడ్పడలేదు. దీప్తి శర్మ 9.3 ఓవర్లలో 39 పరుగులిచ్చి 5 వికెట్లు పడగొట్టి మ్యాచ్‌ను తన చేతుల్లోకి తీసుకుంది. షఫాలీ వర్మ 3 ఓవర్లలో 8 పరుగులిచ్చి 2 వికెట్లు తీసింది. శ్రీచరణి ఒక వికెట్, ఫీల్డర్లు రెండు రనౌట్లు సాధించి ప్రత్యర్థులను పూర్తిగా కట్టడి చేశారు.

 టోర్నీ ప్రయాణం: ప్రతి మ్యాచ్ ఒక మైలురాయి లీగ్ దశలో న్యూజిలాండ్‌పై స్మృతి మంధాన సెంచరీ (109)తో సెమీఫైనల్ స్థానం ఖాయం చేసుకుంది టీమిండియా. సెమీఫైనల్‌లో ఏడుసార్ల ఛాంపియన్ ఆస్ట్రేలియా 337 పరుగుల భ 337 పరుగుల భారీ లక్ష్యాన్ని జెమీమా రోడ్రిగ్స్ (127) మరియు కెప్టెన్ హర్మన్‌ప్రీత్ కౌర్ (89) ధైర్యంగా ఛేదించి ఫైనల్‌కు చేరారు. 2005, 2017లో రన్నరప్‌గా నిలిచిన భారత్, మూడోసారి ఫైనల్‌కు అడుగుపెట్టి ఈసారి కప్‌ను సొంతం చేసుకుంది.

 స్టార్ ఆటగాళ్లు: అందరూ హీరోలే

షఫాలీ వర్మ: గాయంతో బయటపడిన ప్రతీకా రావల్ స్థానంలో ఆలస్యంగా జట్టులో చేరినా, ఫైనల్‌లో బ్యాట్ (87), బాల్ (2/8) రెండింటా రాణించి మ్యాచ్ విన్నర్‌గా నిలిచింది. ప్లేయర్ ఆఫ్ ద మ్యాచ్ అవార్డు ఆమెదే.
దీప్తి శర్మ: టోర్నమెంట్‌లో 215 పరుగులు, 21 వికెట్లు – అత్యధిక వికెట్ టేకర్. ఒకే ఎడిషన్‌లో 200+ పరుగులు, 15+ వికెట్లు సాధించిన తొలి ఆల్‌రౌండర్.
స్మృతి మంధాన:  412 పరుగులతో టోర్నీలో అత్యధిక స్కోరర్. మెగ్ లానింగ్‌తో సమానంగా 17 అంతర్జాతీయ సెంచరీల రికార్డు సృష్టి.
హర్మన్‌ప్రీత్ కౌర్: నాకౌట్ మ్యాచ్‌ల్లో 331 పరుగులతో కొత్త రికార్డు.

 రికార్డుల జల్లు :

– షఫాలీ: ఫైనల్‌లో అత్యధిక వ్యక్తిగత స్కోర్ (87, పూనం రౌత్ 86 రికార్డును బద్దలు కొట్టింది).
– దీప్తి: టోర్నీలో అత్యధిక వికెట్లు (21).

భారత జట్టు: మహిళల వరల్డ్ కప్‌లో తొలి టైటిల్.

దేశవ్యాప్త ఆనందం :

ప్రధాని నరేంద్ర మోడీ “అసాధారణ కృషి, అచంచలమైన ఆత్మవిశ్వాసం” అంటూ అభినందించారు. ఏపీ సీఎం చంద్రబాబు నాయుడు, తెలంగాణ సీఎం రేవంత్ రెడ్డి సహా దేశ నేతలంతా శుభాకాంక్షలు తెలిపారు. దేశమంతా “జయహో భారత్” నినాదాలు మార్మోగాయి. బీసీసీఐ రూ.125 కోట్ల బహుమతి ప్రకటించింది.

చరిత్రలో సువర్ణ అధ్యాయం : 

1983లో కపిల్ దేవ్ పురుషుల జట్టును ఛాంపియన్ చేసినట్లే, ఈ విజయం మహిళల క్రికెట్‌ను కొత్త ఎత్తులకు చేర్చింది. గతంలో రైళ్లలో సాధారణ కంపార్ట్‌మెంట్లలో ప్రయాణం, నేలపై నిద్ర, ఒకే బ్యాట్‌ను పంచుకోవడం – శాంతా రంగస్వామి, డయానా ఎడుల్జి వంటి పూర్వీకులు ఎదుర్కొన్న కష్టాలు ఈ రోజు ఫలితాలుగా మారాయి. 2006లో బీసీసీఐలో విలీనం, డబ్ల్యూపీఎల్ ఆరంభం – ఈ అడుగులు ఈ విజయానికి బలమైన పునాది వేశాయి.

ఈ కప్ కేవలం ట్రోఫీ మాత్రమే కాదు – లక్షలాది బాలికలకు క్రికెట్ కలలు నెరవేర్చే స్ఫూర్తి. భారత మహిళల క్రికెట్ సువర్ణ యుగం ఆరంభమైంది!

The post  భారత్ మహిళల క్రికెట్: 2025 ప్రపంచ కప్ విజయం – స్ఫూర్తిదాయకమైన గాథ appeared first on TelAndra.com.