గతంలో బీసీలకు స్థానిక సంస్థల్లో 42 శాతం రిజర్వేషన్ కల్పిస్తూ నివేదిక వచ్చింది. అయితే సుప్రీంకోర్టు 50 శాతం రిజర్వేషన్ పరిమితిని దాటరాదని స్పష్టమైన ఆదేశాలు ఇచ్చిన నేపథ్యంలో ఆ నివేదిక చట్టపరంగా సమస్యాత్మకమైంది. దీంతో ఎన్నికల నిర్వహణకు అడ్డంకులు తలెత్తాయి.

ఈ సమస్యను పరిష్కరించేందుకు క్యాబినెట్ మరోసారి డెడికేషన్ కమిషన్‌ను ఏర్పాటు చేసింది. ఈ కమిషన్‌కు తక్షణమే నోట్ పంపించి, ఒకటి లేదా రెండు రోజుల్లోనే గ్రామ పంచాయతీలు, మున్సిపల్ వార్డులు, ప్రాదేశిక నియోజకవర్గాల్లో ఎస్సీ, ఎస్టీ, బీసీ, మహిళల రిజర్వేషన్లను 50 శాతం మించకుండా సర్దుబాటు చేసే నివేదిక సమర్పించాలని ఆదేశించింది.

కమిషన్ నివేదిక అందిన వెంటనే, ఈ నెల 25వ తేదీన మరో క్యాబినెట్ సమావేశం నిర్వహించి దానికి ఆమోదం తెలపనున్నారు. ఈ నిర్ణయం వల్ల నవంబరు 24న హైకోర్టులో జరగబోయే విచారణలో కూడా తెలంగాణ ప్రభుత్వం బలమైన వాదన చేయగలుగుతుందని అధికార వర్గాలు భావిస్తున్నాయి.

స్థానిక సంస్థల ఎన్నికలు ఎప్పటి నుంచి నిర్వహించాలనేది ఇప్పటికే ఎన్నికల సంఘం ప్రకటించిన సర్వోన్నత న్యాయస్థానం ఆదేశాలకు అనుగుణంగా ఉండాల్సి ఉండటంతో, ఈ డెడికేషన్ కమిషన్ నివేదిక కీలక పరిణామంగా మారనుంది. త్వరలోనే ఎన్నికల నోటిఫికేషన్ విడుదలయ్యే అవకాశం కనిపిస్తోంది.

The post తెలంగాణ క్యాబినెట్ కీలక నిర్ణయాలు. appeared first on TelAndra.com.

తెలంగాణ మంత్రివర్గం ఇటీవల కీలక సమావేశంలో పలు సంచలనాత్మక నిర్ణయాలు తీసుకుంది. స్థానిక సంస్థల ఎన్నికల నియమావళిలో మార్పులు చేస్తూ, ముగ్గురు పిల్లలు ఉన్నవారు పోటీ చేయకూడదనే నిబంధనను తొలగించాలని ఆమోదం తెలిపింది. ఈ చట్ట సవరణతో ఎన్నికల ప్రక్రియ మరింత సరళంగా మారనుంది. వ్యవసాయ రంగానికి ప్రోత్సాహం ఇవ్వడంపై దృష్టి సారించిన క్యాబినెట్, వానకాలం సీజన్‌లో పండించిన ధాన్యం కొనుగోళ్లను పకడ్బందీగా నిర్వహించాలని నిర్ణయించింది. మద్దతు ధరతో పాటు సన్న వడ్లకు 500 రూపాయల బోనస్‌ను రైతుల ఖాతాల్లో వెంటనే జమ చేయాలని ఆదేశించింది. ఈ సీజన్‌లో 80 లక్షల మెట్రిక్ టన్నులకు పైగా ధాన్యం ప్రొక్యూర్ చేయాల్సి ఉంటుందని అంచనా. కేంద్ర ప్రభుత్వ సహకారం లేకున్నా, ప్రతి గింజకు మద్దతు ధర మరియు బోనస్ అందజేయాలని మంత్రివర్గం తీర్మానించింది.

మరోవైపు, వ్యవసాయ విద్యా విస్తరణకు మూడు కొత్త కళాశాలలకు గ్రీన్ సిగ్నల్ ఇచ్చింది. ప్రొఫెసర్ జయశంకర్ వ్యవసాయ విశ్వవిద్యాలయానికి అనుబంధంగా నల్గొండ, నిజామాబాద్, వికారాబాద్ జిల్లాల్లో ఈ కళాశాలలు ప్రారంభమవుతాయి. నగరాభివృద్ధి అంశాలపై కూడా దృష్టి పెట్టిన క్యాబినెట్, మెట్రో రైల్ విస్తరణను వేగవంతం చేయాలని నిర్ణయించింది. దీనికి సంబంధించి సీఎస్ చైర్మన్‌గా ఆర్థిక శాఖ ముఖ్య కార్యదర్శి, ఎంఏయూడీ కార్యదర్శి, మెట్రో రైల్ ఎండీ తదితరులతో కమిటీని ఏర్పాటు చేయాలని ఆమోదించింది. శ్రీశైలం ఎలివేటెడ్ కారిడార్ నిర్మాణ వ్యయంలో 33 శాతం భరించడానికి, కృష్ణా-వికారాబాద్ రైల్వే లైన్ భూసేకరణ వ్యయానికి గ్రీన్ సిగ్నల్ ఇచ్చింది.

ప్రభుత్వం ఏర్పడి రెండేళ్లు పూర్తయిన సందర్భంగా డిసెంబర్ 1 నుంచి 9 వరకు ‘ప్రజాపాలన ప్రజా విజయోత్సవాలు’ నిర్వహించాలని క్యాబినెట్ నిర్ణయించింది. ఈ నిర్ణయాలు రాష్ట్ర అభివృద్ధికి మరింత ఊపిరి పోస్తాయని అభిప్రాయాలు వ్యక్తమవుతున్నాయి.

The post తెలంగాణ క్యాబినెట్ కీలక నిర్ణయాలు. appeared first on TelAndra.com.