బీఆర్ఎస్ అధినేత, మాజీ ముఖ్యమంత్రి కేసీఆర్ సిట్ విచారణ అధికారిగా ఉన్న జూబ్లీ హిల్స్ ఏసీపీకి ఆరు పేజీల లేఖ రాశారు. ఈ లేఖలో సిట్ వ్యవహారశైలిపై ఆయన తీవ్ర అభ్యంతరాలు వ్యక్తం చేశారు. ముఖ్యంగా తన ఇంటి గోడకు నోటీసులు అంటించడాన్ని చట్టవ్యతిరేక చర్యగా పేర్కొన్నారు.

గోడలకు నోటీసులు అంటించమని చట్టంలో లేదు

సీఆర్పీసీ 160 ప్రకారం నోటీసులు సంబంధిత వ్యక్తికి స్వయంగా అందజేయాల్సి ఉంటుందని కేసీఆర్ స్పష్టం చేశారు. చట్టంలో ఎక్కడా గోడలకు నోటీసులు అంటించమని లేదని పేర్కొన్నారు. రాత్రి 9 గంటల సమయంలో కొందరు వచ్చి తన నివాస గోడకు నోటీసులు అంటించడం పూర్తిగా ఆక్షేపణీయమని అన్నారు.

సుప్రీం కోర్టు, హైకోర్టు తీర్పుల ప్రస్తావన

సిట్ జారీ చేసిన నోటీసులు చట్టబద్ధంగా లేవని పేర్కొంటూ కేసీఆర్ పలు సుప్రీం కోర్టు మార్గదర్శకాలు, ఆంధ్రప్రదేశ్ హైకోర్టు ఆదేశాలను తన లేఖలో ప్రస్తావించారు. చట్టాన్ని పక్కనపెట్టి వ్యవహరిస్తున్నారని సిట్‌పై ఆయన విమర్శలు గుప్పించారు.

నివాసం, పోలీస్ పరిధిపై స్పష్టత

ప్రస్తుతం తాను జూబ్లీ హిల్స్ పోలీస్ పరిధిలో నివసించడం లేదని కేసీఆర్ తెలిపారు. హరీష్ రావు అఫిడవిట్‌లో సిద్దిపేట చిరునామా ఉందని, నందీనగర్‌ను కేవలం కరస్పాండెంట్ అడ్రెస్‌గా మాత్రమే పేర్కొన్నానని గుర్తు చేశారు. గత రెండేళ్లుగా తాను ఎర్రవల్లి ఫామ్ హౌస్‌లోనే ఉంటున్నానని స్పష్టం చేశారు.

విచారణకు సహకరిస్తానన్న కేసీఆర్

చట్టపరమైన అభ్యంతరాలు ఉన్నప్పటికీ సిట్ విచారణకు పూర్తిగా సహకరిస్తానని కేసీఆర్ తెలిపారు. బాధ్యతాయుతమైన ప్రతిపక్ష నేతగా చట్టాన్ని గౌరవిస్తానని అన్నారు. రేపు మధ్యాహ్నం 3 గంటల నుంచి నందీనగర్ నివాసంలో అందుబాటులో ఉంటానని, సిట్ అధికారులు వచ్చి తన స్టేట్‌మెంట్‌ను రికార్డ్ చేసుకోవచ్చని లేఖలో పేర్కొన్నారు.

రాజకీయ వర్గాల్లో ఆసక్తి

కేసీఆర్ ఇవాళ రాత్రే నందీనగర్‌కు చేరుకుంటారా? లేక రేపు ఉదయం వస్తారా? అనే అంశంపై ఇంకా స్పష్టత లేదు. దీనిపై పార్టీ వర్గాల నుంచి అధికారిక సమాచారం రావాల్సి ఉంది.

The post గోడకు నోటీసులు చట్టవిరుద్ధం: కేసీఆర్ appeared first on TelAndra.com.

ఆరోపణలతో మొదలైన కేసు :

కర్ణాటకలోని దక్షిణ కన్నడ జిల్లాలో ఉన్న ధర్మస్థల మంజునాథ స్వామి ఆలయం సంచలనాత్మక ఆరోపణలతో వార్తల్లో నిలిచింది. 1995 నుంచి 2014 వరకు ఆలయంలో పారిశుద్ధ్య కార్మికుడిగా పనిచేసిన భీమ అనే వ్యక్తి, నేత్రావతి నది ఒడ్డున వందలాది మహిళల మృతదేహాలను తాను పాతిపెట్టానని, వారంతా లైంగిక వేధింపులకు గురైనవారని జూన్‌లో పోలీసులకు ఫిర్యాదు చేశాడు. గతంలో ఇక్కడ పలు మిస్సింగ్ కేసులు నమోదు కావడంతో ఈ ఆరోపణలు బలం పొందాయి.

సిట్ దర్యాప్తు, తవ్వకాలు :
కేసును సీరియస్‌గా తీసుకున్న కర్ణాటక ప్రభుత్వం ఐపిఎస్ అధికారి ప్రణబ్ మహంతి నేతృత్వంలో ప్రత్యేక దర్యాప్తు బృందం (సిట్) ఏర్పాటు చేసింది. భీమ సూచించిన 13 ప్రాంతాల్లో తవ్వకాలు చేపట్టగా, కొన్ని అస్తిపంజరాలు, వస్తువులు లభించాయి. అయితే, అవి సామూహిక ఖననాలకు సంబంధించినవి కాదని, ఇతర జబ్బులతో చనిపోయినవారి అస్తికలుగా సిట్ గుర్తించింది. భీమ ఆరోపణలకు సంబంధించిన ఆధారాలు లభించలేదు.

కార్మికుడి యూటర్న్ :

ఇటీవల భీమ తన ఆరోపణలను ఉపసంహరించుకుని, ఒక వ్యక్తి ఇచ్చిన పుర్రెతో ఫిర్యాదు చేయమని చెప్పారని వెల్లడించాడు. దీంతో కేసు పూర్తిగా తిరగబడింది. అతని విశ్వసనీయతపై అనుమానాలు తలెత్తాయి. సిట్ ఇప్పుడు లై డిటెక్టర్ పరీక్షల కోసం కోర్టు అనుమతి తీసుకోనుంది. అలాగే, ఫిర్యాదు చేయించిన వ్యక్తులపై దర్యాప్తు చేపడుతోంది.

సామాజిక చర్చ, ఉద్యమాలు :

ఈ కేసు సోషల్ మీడియాలో, సమాజంలో పెద్ద చర్చనీయాంశంగా మారింది. కొందరు దీనిని హిందూ ధర్మంపై దాడిగా అభివర్ణించగా, మరికొందరు ఆలయ నిర్వాహకులపై చర్యలు తీసుకోవాలని డిమాండ్ చేశారు. గతంలో మిస్సింగ్ కేసులకు సంబంధించిన ఆనవాళ్ళు లేకపోవడం కేసును మరింత జటిలం చేసింది.

ముగింపు :

ధర్మస్థల కేసు ఒక సంచలనంగా మొదలై, కుట్రలతో మలుపు తిరిగింది. కార్మికుడి ఆరోపణల నిజానిజాలు తేల్చేందుకు సిట్ దర్యాప్తు కొనసాగిస్తోంది. ఈ కేసు ఆలయ పవిత్రత, సామాజిక విశ్వాసాలపై చర్చను రేకెత్తించింది.

The post ధర్మస్థల సామూహిక ఖననాల కేసు: ఒక సంచలన మలుపు appeared first on TelAndra.com.