ఏపీలో మావోయిస్టుల భారీ అరెస్ట్: 50 మంది పట్టుబడ్డారు.
ఏపీలో మావోయిస్టులపై పోలీసులు భారీ దాడులు నిర్వహించారు. కృష్ణా, ఎన్టీఆర్, కాకినాడ, కోనసీమ, అల్లూరి సీతారామరాజు జిల్లాల్లో ఏకకాలికంగా జరిగిన ఈ ఆపరేషన్‌లో 50 మంది మావోయిస్టులను అదుపులోకి తీసుకున్నారు. వీరి దగ్గర నుంచి పెద్ద ఎత్తున ఆయుధాలు, పేలుడు పదార్థాలు స్వాధీనం చేసుకున్నారు.
స్వాధీనం చేసుకున్న ఆయుధాల్లో ఒక పిస్టల్, రెండు రివాల్వర్లు, రెండు డబుల్ బ్యారెల్ గన్నులు, 31 కంట్రీ మేడ్ సింగిల్ బ్యారెల్ గన్నులు, రెండు ప్రపంచాలు (తపంచాలు), ఒక 8 ఎంఎం వుడెన్ గన్ ఉన్నాయి. మొత్తం 39 ఆయుధాలతోపాటు 142 రౌండ్ల తూటలు, పిస్టల్-డీబీబీఎల్-ఎస్బీబీఎల్ మాగజైన్లు రెండు, ఏకే-47 మాగజైన్, స్టన్ గన్ మాగజైన్, 22 రైఫిల్, గ్రెనేడ్ ఇమిటేషన్, ఎలక్ట్రికల్ వైర్లు, కొంత నగదు కూడా సీజ్ చేశారు.
ఈ ఆయుధాలు మావోయిస్టులు స్వరక్షణ కోసమేనా లేక పోలీసులపై దాడులకు సిద్ధమవుతున్నారా అనే అనుమానాలు వ్యక్తమవుతున్నాయి. రాష్ట్రంలో శాంతిభద్రతలకు ఎలాంటి ఆటంకం కలగకుండా ముందుజాగ్రత్త చర్యల్లో భాగంగానే పోలీసులు ఈ ఆపరేషన్ చేపట్టినట్టు తెలుస్తోంది. నిన్నటి నుంచి జరుగుతున్న ఈ దాడులు రాష్ట్రవ్యాప్తంగా సంచలనం రేపాయి.
