డబ్ల్యూపీఎల్ 2026: ఆర్సిబి ఫైనల్కు దూసుకెళ్లింది
మహిళల ప్రీమియర్ లీగ్ (డబ్ల్యూపీఎల్) 2026 సీజన్ తుది దశకు చేరుకుంది. రాయల్ ఛాలెంజర్స్ బెంగళూరు (ఆర్సిబి) ఫైనల్కు దూసుకెళ్లింది. కీలక మ్యాచ్లో యూపీ వారియర్స్ను చిత్తుచిత్తుగా ఓడించి టైటిల్కు ఒక అడుగు దూరంలో నిలిచింది. వరుసగా ఐదు విజయాలతో ప్లేఆఫ్స్కు చేరిన ఆర్సిబి, రెండు ఓటముల నుంచి తేరుకుని అదరగొట్టింది.
మ్యాచ్ వివరాలు :
టాస్ ఓడి బ్యాటింగ్ చేసిన యూపీ వారియర్స్కు ఓపెనర్లు దీప్తి శర్మ, మెగ్ లానింగ్ భారీ ఆరంభం ఇచ్చారు. తొలి వికెట్కు 74 పరుగులు జోడించారు. దీప్తి శర్మ 55 పరుగులతో అవుట్ అయ్యింది. తర్వాత మెగ్ లానింగ్ కూడా త్వరగా పెవిలియన్ చేరింది. మిగిలిన బ్యాటర్లు క్రీజ్లో నిలవలేకపోయారు. 20 ఓవర్లలో యూపీ వారియర్స్ 143 పరుగులకే పరిమితమైంది.
ఆర్సిబి భారీ విజయం :
143 పరుగుల టార్గెట్ను ఛేదనలో ఆర్సిబి ఫుల్ జోష్తో బ్యాటింగ్ చేసింది. ఓపెనర్ హారిస్ అదరగొట్టింది. 37 బంతుల్లో 13 ఫోర్లు, 2 సిక్సర్లతో 75 పరుగులు చేసి అవుట్ అయింది. తొలి వికెట్కు 9.1 ఓవర్లలో 108 పరుగులు జోడించారు. కెప్టెన్ స్మృతి మంధాన దూకుడుగా ఆడి మ్యాచ్ను ముగించింది. 27 బంతుల్లో 8 ఫోర్లు, 2 సిక్సర్లతో 54 నాటౌట్గా నిలిచింది. 13.1 ఓవర్లలోనే టార్గెట్ను చేదించి 7 వికెట్ల తేడాతో భారీ విజయం సాధించింది.
పాయింట్ల పట్టిక స్థితి :
ఈ విజయంతో ఆర్సిబి 12 పాయింట్లతో టాప్ స్థానంలో నిలిచి ఫైనల్ బెర్త్ను కన్ఫర్మ్ చేసుకుంది. ఎనిమిది మ్యాచ్ల్లో 6 విజయాలు, 2 ఓటములతో అద్భుత ప్రదర్శన చూపింది. యూపీ వారియర్స్ ప్లేఆఫ్స్ రేస్ నుంచి ఎలిమినేట్ అయింది. మిగిలిన జట్లకు ఒక్కో మ్యాచ్ మిగిలి ఉండగా, మూడు జట్లు మాత్రమే ఫైనల్ రేస్లో నిలిచాయి.
స్మృతి మంధాన బృందం ఈ సీజన్లో అద్భుత ఫామ్లో ఉంది. ఫైనల్లో టైటిల్ సాధించేందుకు ఆర్సిబి సిద్ధంగా ఉంది.
